207 mijë euro është dëmi i llogaritur për 8 viktimat pjesëmarrëse në rastin e Salih Mustafës.
Për asnjërin prej tyre, dëmshpërblimi nuk është paguar ende.
Mbrojtja e “Calit” është ende duke luftuar që pagesa e këtyre viktimave të mos bëhet nga Mustafa direkt, për shkak të vështirësive financiare të tij.
Mbrojtja përmes një parashtrese, argumentoi se sa e dëmton procesin e zhdëmtimit edhe aplikimi i kamatës prej 8%.
“Mustafa është aktualisht 53 vjeç, është shpallur plotësisht i varfër dhe ende duhet të vuajë pjesën e mbetur të dënimit të tij. Shtimi i një interesi vjetor prej 8% në borxh do ta zgjaste borxhin për një kohë të pacaktuar”.
Mbrojtja insiston që zhdëmtimi i viktimave të kryhet nga ana e shtetit të Kosovës, të cilin më pas do e kompensonte vet Mustafa, në afat më të gjatë kohor.
“Shteti i Kosovës, mund të ekzekutojë pjesën tjetër të dëmshpërblimeve për Mustafën. Në këtë rrugë alternative, personi i dënuar do të ketë ende detyrimin për të paguar. Personi i dënuar duhet vetëm të paguajë një entitet tjetër: në vend të viktimave, ai do të duhej t’ia rimbursonte ato Shtetit të Kosovës. Shteti është edhe në një pozicion më të mirë për të mbledhur paratë që i detyrohet personi i dënuar”.
Mirëpo, një gjë e tillë po shihet si pamundur pasi që vlerësohet se nuk ka bashkëpunim mes institucioneve të Kosovës dhe Speciales.
Sipas Behxhet Shala nga KMDLNj, e udhës do të ishte që gjitha këto shpenzime që rrjedhin nga proceset gjyqësore në Hagë, t’i mbulojë vet Gjykata Speciale.
Televizioni ka dërguar pyetje edhe në Ministrinë e Drejtësisë në lidhje me kërkesën e mbrojtjes së Mustafës, por gjatë ditës nuk ka marrë përgjigje.
