Deputetja e Partisë Demokratike të Kosovës, Ganimete Musliu, është tërhequr nga seanca e sotme në Kuvend, ku në rend të ditës ishin të parapara pyetjet parlamentare të deputetëve për kabinetin qeveritar.
Kjo ndodhi pasi të njëjtit nuk janë fare të pranishëm në seancë, me ç’rast, Musliu u bëri thirrje ta kryejnë obligimin e tyre ndaj Kuvendit e qytetarëve.
Madje, Musliu vlerësoi që mospjesëmarrja e asnjërit nga ministrat sot, e degradon njëherë e mirë Kuvendin.
“Unë ua jap dorën kabinetit qeveritar të “luajnë me neve si deputetë”, përderisa ne ua krijojmë luksin që ata të vijnë të bëjnë fushata elektorale, ta gënjejnë popullin, e të bëjnë demagogji në këtë kuvend, atyre hallall iu qoftë që luajnë me ne, e nuk vijnë nga pak edhe të na rrahin këtu në foltore. Andaj unë tërhiqem nga kjo seancë, sepse është e pakuptimtë dhe e padrejtë. Ose koordinohuni me kabinetin qeveritar që ata të vijnë ta kryejnë obligimin ndaj Kuvendit dhe qytetarëve, ose mos i thërrisni këto seanca koti, kjo është seancë hajgare, kjo është seancë e cila edhe njëherë përfundimisht e degradon Kuvendin, jemi bërë qesharakë, asgjë nuk ka mbetur më në këtë Kuvend”, deklaroi Musliu para deputetëve.
Po ashtu, deputetja e PDK-së, tha se në seancën e sotme, kishte pyetje për Ministrin e Punëve të Brendshme, Xhelal Sveçla dhe Ministrin e Mjedisit, Planifikimit Hapësinor dhe Infrastrukturës, Liburn Aliu, por që të dy kanë zgjedhur të mos jenë prezent në këtë debat parlamentar.
“Është e pakuptimtë që ministrat në asnjë seancë nuk vijnë të përgjigjen dhe është e pakuptimtë. Unë e kam bërë një pyetje për ministrin Xhelal Sveçla me datën 5 qershor 2023, sot është 1 dhjetori dhe ai nuk vjen të përgjigjet. Vetë fakti që unë kam pyetje sot për Liburn Aliun dhe Xhelal Sveçlën dhe asnjëri nga ta nuk janë këtu, nuk e di pse ia vlen të rrimë në këtë seancë”, shtoi tutje Musliu.
Kujtojmë se dje, Kuvendi mbajti seancë ku u diskutua për Raportin e Progresit të Komisionit Evropian për Kosovën.
