Deputetja e Partisë Demokratike të Kosovës, Ariana Musliu-Shoshi, në emisionin veror “Nxet” në Tëvë1, bëri të ditur se njëri nga kërcënuesit e saj tashmë është arrestuar dhe po mbahet në paraburgim për 30 ditë.
E pyetur për eksperiencën e saj me mesazhe kërcënuese në rrjete sociale, Musliu-Shoshi, tha se në situata të tilla gjithmonë do të përballen me drejtësinë, derisa e vlerësoi mjaft shqetësuese një dukuri të përhapur si kjo, shkruan teve1.info.
“Kur jemi te mesazhet kërcënuese, personi që më ka kërcënuar mua dhe dy nga kolegët e mi, të gjithë janë në proces gjyqësor, njëri prej tyre veçse është në paraburgim, ka 30 ditë. Është mërgimtar, e kanë zënë në kufi. Mesazhet kërcënuese nuk janë si diçka që të frikësojnë si person, por më shumë është brengë se ku jemi si shoqëri dhe në çfarë niveli kemi rënë. Mesazhi ka qenë mjaft kërcënues, ka qenë “i ke edhe dy muaj jetë, do të masakroj në shesh”. Pastaj e kam lajmëruar në polici. 3 raste janë të cilat i kam denoncuar dhe njëri tashmë është në paraburgim. Më vjen keq për ata që me motive politike bëjnë komente të tilla, sepse është dashur të respektohet fjala dhe liria e secilit. Ne si deputetë nuk do të hezitojmë t’i paraqesim mesazhet kërcënuese, do të përballen të gjithë me drejtësinë”, u shpreh Musliu-Shoshi në Tëvë1.