Deputetja e Partisë Demokratike të Kosovës (PDK), Ariana Musliu-Shoshi, thotë se kryetari i kësaj partie politike është takuar me kryeministrin Albin Kurti me të vetmin qëllim për caktimin e datës së zgjedhjeve.
Shoshi thotë se është dakorduar që nëse i kanë votat e deputetëve të ketë zgjedhje dhe të bëhet shpërndarja e Kuvendit.
Në studion e emisionin “Info Nata” në Tëvë1, Shoshi thotë se data të mundshme për zgjedhje të reja mund të jenë 30 qershori dhe 7 korriku e më së largu më 14 korrik.
“Si parti demokratike që jemi kryetari ynë e ka vlerësuar në të mirë të vendit që të jetë pjesë e takimit dhe si udhëheqës i opozitës ka shkuar me kërkesë të qartë që e ka bërë të ditur edhe para se të merrte pjesë në darkë. Tema të cilën e ka kërkuar PDK-ja ka qenë data e zgjedhjeve dhe një gjë të tillë ne e kemi arrit. Pra, Kurti e ka bërë ftesën për agjendë legjislative”, deklaroi ajo.
Deputetja opozitare tha se çdo datë pas 14 korriku, PDK nuk e sheh pastaj të arsyeshme që vendi të shkojë në zgjedhje.
“Ne kemi vlerësuar që duhet të diskutojmë për datën e zgjedhjeve dhe kemi arrit që të kemi një dakordim që nëse i kemi numrat në Kuvend të Kosovës, nëse kemi pajtueshmëri si parti opozitare vendi mund të shkojë edhe në zgjedhje dhe të bëhet shpërndarja e Kuvendit me votat e deputetëve. Na duhet 80 vota dhe një gjë e tillë do të ishte në të mirë të vendit tani për tani… Data të mundshme për zgjedhje të reja mund të jenë 30 qershori apo 07 korrik, më e largëta 14 korrik. Çdo datë që shtyhet më vonë se këto të propozuara, ne si PDK nuk e vlerësojmë që ia vlen të kemi zgjedhje në vendin tonë, pasi e kemi parasysh që korriku dhe gushti janë pushim e pastaj mbesin edhe tre muaj që ligjërisht do të duhej të thirr presidentja zgjedhje të rregullta.
E pyetur nëse ka gjasa reale që të shpërndahet Kuvendi gjatë javëve të ardhshme, ajo nuk e ka përjashtuar si mundësi.
“Besoj se gjasat reale janë që të ndodhë, por duhet të kemi koordinim me shefat e grupeve parlamentare si të Aleancës për Ardhmërinë e Kosovës ashtu edhe të Lidhjes Demokratike”, ka thënë Musliu -Shoshi./teve1.info/
