Deputetja e Partisë Demokratike të Kosovës, Ariana Musliu – Shoshi, në një konferencë për media ka ftuar organet e drejtësisë që të hetojnë mbi raportimin e medieve mbi skandalet në Ministrinë e Punëve të Jashtme dhe të Diasporës, sipas së cilës, lidhen me keqpërdorimin e dokumenteve zyrtare të qytetarëve dhe ndërhyrjet e saj joligjore në organizimin e zgjedhjeve të përgjithshme.
Musliu-Shoshi ka thënë se dëmi që u është bërë qindra mërgimtarëve nga “dështimi i MPJ-së” është i pallogaritshëm.
“Pikërisht kur menduam se të paktën kjo javë do të kaloj pa një skandal qeveritar mediet fatmirësisht publikuan dy afera të MPJ-së. 406 pasaporta, 165 letërnjoftime, 4 vendime për shtetësi të mërgimtarëve tanë janë humbur në postën diplomatike të RKS-së. Siç mësohet tenderi për shpërndarjen e këtyre dokumenteve të rëndësishme të qytetarëve tanë që jetojnë në mërgatë i ishte dhënë një kompanie me çmim shumëfish të shtrenjtë, hiç më pak se 6 herë më të shtrenjtë. Dëmi që u është bërë qindra qytetarëve tanë që jetojnë në mërgatë, të cilët kanë shumë vështirësi me të cilat përballen, është i pallogaritshëm. Si pasojë e këtij dështimit të punës së MPJD shumë udhëtime e bashkime familjare do të shtyhen, shumë punë do të ndërpriten e shumë plane të tyre do të prishen”, ka thënë ajo.
Deputetja e PDK-së shtoi se kjo ministri, e posaçërisht kjo Ministre, gjatë këtyre katër viteve ka dëshmuar vazhdimisht se nuk është as e Jashtme, as e Diasporës, dhe as e aftë për forcuar pozicionin e shtetit tonë në botë.
“Mërgatën tanë, kjo Qeveri i do vetëm për fushatë, për vota dhe për shfrytëzim politik. Këtë e vërteton edhe skandali tjetër i cili u zbulua dje nga mediat, për ndërhyrjen e MPJD-së në organizimin e zgjedhjeve. Në kundërshtim me Ligjin për Zgjedhjet e Përgjithshme dhe Kushtetutën e Republikës, kjo ministri ka kërkuar nga ambasadorët dhe drejtuesit e misioneve konsullore që të sigurojnë hapësira të reja për votimin e diasporës për zgjedhjet nacionale”, ka thënë ajo.
Musliu – Shoshi tha se është e parë në historinë e Republikës së Kosovës që një Ministre e Punëve të Jashtme ka mandat të plotë, ndërkohë që asnjë njohje nuk i ka ardhur vendit dhe asnjë anëtarësim në organizata ndërkombëtare nuk është realizuar.
Deputetja, në fund të konferencës së saj ka falënderuar të gjitha mediat dhe gazetarët në Kosovë, të cilët, përkundër përndjekjes politike, shantazheve dhe kërcënimeve nga ana e pushtetit, po vazhdojnë ta bëjnë me profesionalizëm punën e tyre.
Ndryshe, Ministria e Jashtme dje (e premte) ka njoftuar se ka shkëputur kontratën me operatorin për ofrim të shërbimeve postare diplomatike shkaku i “vonesave të papranueshme në dërgimin e dokumenteve”. Në raportimet e medieve është thënë se qindra dokumente të mërgimtarëve janë humbur në postën diplomatike të Kosovës, kurse Gërvalla e ka mohuar një gjë të tillë./teve1.info/
