Deputetja e Partisë Demokratike të Kosovës, Ganimete Musliu, ka thënë se Qeveria e Kosovës e ka përqendruar krejt vëmendjen te dialogu, derisa ka shtuar se Kosova po e përjeton një eksod në heshtje, raporton teve1.info
Gjatë fjalimit të saj në Kuvend, Musliu tha se Kosova po përjeton eksod të madh në heshtje dhe se Qeveria duhet të ndërmarrë hapa urgjent për ta parandaluar zbrazjen e vendit.
“Kosova po e përjeton eksodin më të madh në heshtje. Emigrim ka pasur dhe do të ketë gjithmonë, por ajo që po na ndodh nuk është emigrim normal, por një zbrazje që është revoltë e politikëbërjes dhe arrogancës së pushtetit. Arsyeja kryesore është humbja e shpresës nga kjo klasë politike. Kosova ndodhet në një katastrofë kombëtare. Qeveria duhet të marrë hapa urgjentë për ta parandaluar zbrazjen e vendit. Prandaj, është momenti i fundit të reflektojmë që të punojmë për mirëqenien e qytetarëve sepse Kosova po boshatiset”, ka deklaruar Musliu.
