Eksperti i çështjeve të sigurisë, Agim Musliu, ka deklaruar sot se Kosova duhet të marrë shembull nga Gjermania, e cila po shqyrton mundësinë e ndalimit të partisë së ekstremit të djathtë AfD, dhe të veprojë njësoj me Listën Serbe, të cilën e cilëson si kërcënim serioz për rendin kushtetues të vendit.
Musliu përmes një postimi në Facebook ka shkruar se Kosova duhet t’i luftojë armiqtë e demokratikë.
“Nëse Gjermania, një ndër demokracitë më të konsoliduara në botë, e sheh AfD-në si rrezik, Kosova ka arsye shumë më të forta për të shqyrtuar ndalimin e Listës Serbe, e cila funksionon si instrument i Beogradit për të shkatërruar shtetësinë tonë”, shkroi Musliu.
Ai rikujtoi se personi me ndikim të madh brenda Listës Serbe, Millan Radoiçiq, është përgjegjës për sulmin terrorist në Banjskë, për sulme ndaj KFOR-it, Policisë së Kosovës dhe qytetarëve, si dhe për përfshirjen në vrasjen e politikanit serb Oliver Ivanoviq.
Musliu e quajti refuzimin e KQZ-së për ta certifikuar Listën Serbe “një hap të domosdoshëm dhe vetëm sinjal se paradoksi politik duhet trajtuar seriozisht”.
“Lista Serbe kurrë nuk e ka fshehur qasjen sabotuese ndaj Kosovës, qoftë përmes komunikatave të saj publike apo përmes veprimeve terroriste dhe sistematike që kanë rrezikuar sigurinë dhe rendin demokratik. Organet e drejtësisë duhet të hetojnë dhe të marrin masa konkrete”, theksoi ai.
