Eksperti i sigurisë, Agim Musliu, ka deklaruar se dy kandidatë të larguar nga partia “Për Liri, Drejtësi dhe Mbijetesë” e Nenad Rashiqit, sipas të gjitha gjasave, janë ndaluar në Serbi nga institucionet e sigurisë serbe.
Sipas Musliut, gjatë ndalimit ndaj tyre është ushtruar presion i jashtëzakonshëm, duke i detyruar të dalin publikisht me deklarata për largimin nga subjekti politik.
Ai ka theksuar se në të kundërtën, ata do të përballeshin me arrestim ose pasoja edhe më të rënda.
“Nëse nuk do ta bënin këtë, do të arrestoheshin apo do të përballeshin me pasoja edhe më të rënda”, ka shkruar Musliu në Facebook.
Ai ka vlerësuar se ky është një mekanizëm përmes të cilit presidenti i Serbisë, Aleksandar Vuçiq, ushtron presion ndaj serbëve të Kosovës për t’i detyruar të votojnë në përputhje me interesat e Serbisë, konkretisht për Listën Serbe.
“Vuçiq krenohet me këtë veprim, por të gjithë e dinë, ose duhet ta dinë, se kjo përbën një krim të rëndë ndaj një qytetari dhe një ndërhyrje flagrante në zgjedhjet në Kosovë”, ka shtuar ai.
Musliu ka bërë të ditur se familjarët dhe rrethi i ngushtë i Nikolçeviçit janë të informuar për presionin e ushtruar ndaj tij, si dhe për faktin se ai nuk ka pasur asnjë mundësi reale për ta kundërshtuar apo denoncuar këtë presion, as pas largimit nga Serbia.
“Këto janë metoda brutale shantazhi të stilit rus, të cilat Serbia po i aplikon sistematikisht ndaj serbëve të Kosovës dhe, në mënyrë direkte, ndaj vetë Kosovës”, ka përfunduar Musliu.
