Florent Muslija nuk do të largohet nga skuadra e Freiburgut edhe pse ishte në listën e transferimeve të kësaj vere.
Mesfushori i Kombëtares së Kosovës, do të mbetet pjesë e Freiburgut për sezonin 2025/26 dhe pritet të jetë njëri nga lojtarët më të rëndësishëm të ekipit.
27-vjeçari ka bindur trajnerin Julian Schuster në fazën përgatitore pas zhgënjimit në sezonin e fundit, ku regjistroi vetëm 9 paraqitje në Bundesligë.
Muslija shkëlqeu në ndeshjen e fundit kontrolluese të Freiburgut kundër Hamburgut që u zhvillua prapa dyerve të mbyllura dhe ishte prova e fundit sekrete para sezonit të ri.
Freiburgu fitoi 4:0 kurse Muslija ishte i përfshirë në të gjitha golat, ku realizoi të parin në minutat e para të ndeshjes dhe asistoi në tre të tjerët.
Kështu që, Muslija pritet të jetë arma sekrete në sezonin e ri tek Freiburgu, ekip me të cilin ka kontratë deri në vitin 2028.
