Ish-gjyqtarja në Gjykatën Kushtetuese, Gjylieta Mushkolaj ka thënë se në marrëveshjen mes kryeministrit të Kosovës, Albin Kurti dhe presidentit të Serbisë, Aleksandar Vuçiq pamundësohet krijimi i një autonomie politike të serbëve.
Ish-gjyqtarja, thotë se me këtë marrëveshje pushteti i tretë është i eliminuar.
“Pushteti i tretë është i eliminuar me këtë marrëveshje. Nivelit të tretë të pushtetit nuk shoh. Për çështje të ndryshme të menaxhimit të komunitetit serb siç është shëndetësia, kultura arsimi etj, kuptohet ju garantohet pakicave kombëtare, nëse ne nuk duam të jetojmë në vazhdimësi në izolim ju garantohet gjithandej në Evropë”, tha ajo në emisionin “ResPublika” në Tëvë1.
Ajo ka thënë se Serbia është shtet që nuk garanton vetmenaxhim për pakicën shqiptare.
“Serbia është njëra prej atyre shteteve që nuk garanton vetmenaxhim të pakicave sidomos të pakicës shqiptare dhe për këtë arsye ne duhet ta ritheksojmë për çdo ditë, por për ta ritheksuar në mënyrë edhe më të fuqishme ne duhet të jemi anëtarë të mekanizmave evropianë dhe Këshilli i Evropës është organizata e parë ku ne duhet të anëtarësohemi dhe duhet theksuar se anëtarësimi në organizata ndërkombëtare nënkupton marrje të obligimeve”, tha ajo.
