Ish-gjyqtarja në Gjykatën Kushtetuese, Gjyljeta Mushkolaj, tha se Kushtetuta e Kosovës ka probleme serioze.
Në 16-vjetorin e miratimit të Kushtetutës së Kosovës, Mushkolaj tha se minoriteti serb me 10 vende të garantuara në Kuvend, kanë mundësi të bëjnë bllokada të ligjeve shumë të rëndësishme, siç është Ligji i arsimit.
Përveç kësaj problematike, Mushkolaj potencoi se asnjëra nga qeveritë s’kanë arritur t’iu garantojnë minoriteteve zgjedhje të lira dhe të pavarura.
“Kushtetuta e Kosovës ka probleme serioze, por ato segmente të Kushtetutës janë segmente të cilat janë negociuar deri sa është miratuar nga Kuvendi i Kosovës dokumenti i Ahtisarit. Kushtetuta e Kosovës ka bllokada të tilla që minoriteti serb me 10 vende të garantuara, gjithashtu minoritet tjera me 10 vende të tjera të garantuara, kanë mundësi që të bllokojnë jo vetëm ndonjë ndryshim kushtetues të domosdoshëm, por kanë mundësi të bëjnë edhe bllokada të tjera sa i përket ligjeve shumë të rëndësishme, siç është ligji i arsimit. Megjithatë, s’janë problem minoritetet për bllokada të tilla, por është problemi që gjatë këtyre viteve pavarësi, asnjëra nga qeveritë s’ka pasur sukses që t’iu mundësojë dhe t’u garantoj minoriteteve zgjedhje të lira dhe të pavarura”, theksoi Mushkolaj në emisionin “Ditari” në Tëvë 1.
Madje, ish-gjyqtarja tha se në Kosovë është lejuar që Beogradi përmes minoriteteve, të ketë mundësi t’i imponojë vendimet e veta.
“Ne po e shohim edhe këto ditë, që madje edhe për shkarkim të kryetarëve aktual është problem, sepse në Kosovë është lejuar që vetë Beogradi të ketë mundësi që përmes minoriteteve t’i imponojë vendimet e veta”, shtoi tutje ajo.
Kushtetuta e Kosovës u ratifikua më 9 prill 2008 dhe hyri në fuqi më 15 qershor të të njëjtit vit. Si akti më i lartë juridik në vend, kjo kushtetutë u garanton të drejtat dhe liritë themelore të gjithë qytetarëve të vendit./teve1.info/.
