Avokati, Skender Musa, ka deklaruar se në rastin e vdekjes së 27-vjeçarit nga Lipjani në mënyrë absolute nuk mund të ketë pasur vrasje nga pakujdesia me vetëdije nga zyrtarët policorë.
Musa është shprehur kështu pasi sipas tij asnjëri prej pesë zyrtarëve nuk beson se kanë qenë të vetëdijshëm se në bazë të reagimeve të tyre personi do të përfundojë me vdekje.
“Për ta bërë cilësimin juridik të veprës penale së pari duhet të bëhet autopsia sepse te vrasjet nga pakujdesia i kemi dy lloje: kemi pakujdesi me vetëdije dhe pakujdesi pavetëdije. Në këtë rast në mënyrë absolute nuk mund të ketë pakujdesi me vetëdije që gjatë arrestimit do të ndodhë edhe vdekja e të ndjerit për shkak se zyrtarët policorë si mbrojtës të rendit dhe qetësisë publike nuk kryejnë vepra të tilla me dashje, edhe në bazë të reagimeve të policëve mund të ketë tejkalim të autorizimeve apo përdorim jo proporcional të dhunës, por te dashja është komplekse edhe vetëdija se këtu dashje nuk ka po vetëdije. Asnjëri prej këtyre zyrtarëve nuk besoj që kanë qenë të vetëdijshëm se në bazë të reagimeve do të përfundojë me vdekje personi”, ka thënë ai në emisionin “Këndi I Debatit” në Tëvë1.
Tutje, ai ka shtuar se në videon e publikuar më shumë duket se viktima bënte veprime të pakontrolluara sesa sulm ndaj policëve.
“Pastaj ne e pamë në bazë të këtyre pamjeve kamerat janë provë shumë e rëndësishme materiale që mund të analizohen dhe të sqarohen dhe në bazë të pamjeve u vërejt që personi është në ndikim të rëndë të substancave qofshin ato alkoolike apo narkotike, u vërejt edhe sulmi që ishte ndaj Policisë, mirëpo në asnjë formë nuk arsyetohet mënyra e arrestimit. Pa qenë prezent në vend të ngjarjes ose dëshmitarë nuk mund ta dish sa ka qenë fuqia e viktimës, sa ka rezistu se në video shihet që njërën dorë ia kapin 2-3 policë për ta prangosur. Unë mendoj se në këtë video nuk u duk si sulm ndaj policëve më tepër shkonte si në mënyrë të pakontrolluar i ndjeri”, është shprehur Musa.
Musa gjithashtu ka theksuar se viktima mund të ketë vdekur edhe nga infarkti ose ngulfatja si pasojë e mbidozës.
“Këtu ka pasur mundësi edhe infarkt për shkak se ka qenë me mbidozë edhe i dehur ka pasur mundësi edhe ngulfatja, mirëpo duhet të lidhet ajo që edhe infarkti edhe ngulfatja nëse kanë ardhur si shkaktar i vdekjes duhet shumë me kujdes të hetohet rasti dhe të shihet se a ka ndikim momenti i arrestimit të tij me faktorin e jashtëm nga dhuna e përdorur nga ana e Policisë”, ka deklaruar Musa.
