Luftimi i trafikimit me substanca narkotike në vend, krahasuar me vitin e kaluar ka shënuar rritje.
Të paktën kështu thotë drejtori i Anti-Drogës në Policinë e Kosovës, Reshat Murseli.
Në një intervistë për Tëvë1, ai tregon se kanë rritur edhe numrin e aksioneve dhe sasinë e konfiskuar të drogës.
“Marihuana është njëra nga drogat që ka qenë më shumë prezente në vendin tonë gjatë këtij viti dhe në aspektin e sasive kemi mbi 900 kilogramë substancë narkotike të llojit marihuanë që është konfiskuar nga Drejtoria e Anti-Drogës në bashkëpunim edhe me Agjencione tjera. Pastaj kemi edhe kokainën e cila fatkqësisht është edhe në rritje e sipër, këtë vit është në sasi mbi 18 kilogramë në përgjithësi. Domethënë gjitha këto i ka parapri një punë voluminoze e Policisë së Kosovës, gjegjësisht njësisë Anti-Drogë”, ka thënë ai
Sipas tij, trendit të rritjes së prezencës së drogës së llojit kokainë, nuk po i shpëton as Kosova.
“Policia e Kosovës ka ndërmarrë disa hapa parandalues, ne kemi hartuar gjatë kësaj kohe plane operative të cilat kanë pasë për qëllim aspektin preventiv, në bashkëpunim me Drejtoritë Rajonale përkatëse kemi pasë aksione të cilat në kuptime të ndryshme kanë pasur një efekt pozitiv që me dhënë mundësinë më pak me depërtu kokaina në vend, por sido që të jetë tendencat e saj janë në rritje e sipër në vazhdimësi. Vetë statistikat dhe vetë rastet flasin që ka pasë tendencë të rritjes, fatkeqësisht tendenca e rritjes është edhe te aspekti i përdorimit”, shprehet Murseli.
Por, a është Kosova vend transit për qarkullimin e llojeve të ndryshme të drogave?
“Është e vërtetuar se Kosova kryesisht përdoret si vend transit i drogave, i të gjitha llojeve të drogave por në veçanti ka qenë e shprehur marihuana, heroina dhe kokaina. Natyrisht edhe kokaina ka qarkullim edhe përmes Kosovës një pjesë, por një pjesë që ne kemi kapë është kryesisht për tregun lokal. Ndërsa marihuana dhe heroina kanë qenë më tepër që kanë qarkulluar përmes vendit tonë nga fakti që thashë pozicioni gjeografik i mundëson, mënyra se si zhvillohet tregtia në Kosovë dhe shumë faktorë ndikojnë që vendi të përdoret si vend transit”, tregon Murseli.
Që nga janari, kjo Drejtori ka iniciuar 622 raste për trafikim me substanca narkotike, ku janë 814 persona të involvuar e 795 prej tyre janë arrestuar.
