Pas rinovimit të kontratës deri në verën e vitit 2029 me Mallorcan, sulmuesi Vedat Muriqi ka një synim tjetër me fanellën e ekipit nga La Liga.
Muriqi i është vënë pas rekordit të kamerunasit, Samuel Eto’o te Mallorca, të cilin synon ta barazojë ose ta thyejë.
Eto’o është golashënuesi më i mirë në histori të Mallorcas me 70 gola në total në 161 ndeshje të luajtura në të gjitha garat përgjatë 5 sezoneve.
Vetëm në La Liga, Eto’o ka shënuar 54 gola në 133 paraqitje me Mallorcan, ndërsa Muriqi ka 34 gola në kampionat në 109 ndeshje të luajtura për Mallorcan.
“Kur erdha në Mallorca nuk e kisha këtë në mendje, por tani jam afër dhe shpresoj këtë ta arrij në sezonin e ri”, është shprehur Muriqi.
Në fakt, Muriqi ka thënë se sezonin e kaluar, në të cilin u përball me lëndime tashmë e ka lënë prapa dhe është optimist i madh për sezonin e ri.
“Jam përgatitur më mirë se kurrë. Kam pasur një parasezon të mirë dhe jam fizikisht gati të kthehem në Muriqin që isha tre vjet më parë”, shtoi Muriqi.
31-vjeçari prej vitit 2022 është pjesë e Mallorcas, ekip të cilit iu bashkua nga skuadra e Lazios.
