Sulmuesi i Kombëtares së Kosovës, Vedat Muriqi nuk do të largohet nga skuadra e Mallorcas të paktën deri në fund të këtij sezoni.
Mediumet spanjolle kanë bërë të ditur se Mallorca tashmë ka refuzuar ofertën e Fenerbahçes për Muriqin, i cili gjithashtu nuk është i interesuar të rikthehet në Turqi.
Fenerbahçe ka ofruar 10 milionë euro për ta bindur Mallorcan në lirimin e Muriqit në janar, por klubi spanjoll nuk dëshiron ta shesë sulmuesin kosovar në gjysmë të sezonit pasi 30-vjeçari po vlerësohet i rëndësishëm për trajnerin Jagoba Arraraste.
Kështu që, Muriqi do të mbetet pjesë e Mallorcas të paktën deri në verën e vitit të ardhshëm.
Muriqi kërkohej me ngulm nga trajneri i Fenerbahçes, Jose Mourinho që e shihte si zëvendësim ideal për marokenin Youssef En-Nesyri, i cili do të transferohet në Arabinë Saudite.
Muriqi ka kontratë me Mallorcan deri në vitin 2027 kurse këtë sezon ka realizuar 3 gola dhe ka bërë 2 asistime në 14 ndeshje të luajtura në kampionatin spanjoll.
Para se t’i bashkohej Mallorcas, Muriqi ka qenë pjesë e Fenerbahçes në sezonin 2019/20 prej të cilit u transferua te Lazio në Itali.
