Sulmuesi i Kombëtares së Kosovës, Vedat Muriqi është përfshirë në ekipin më të mirë të xhiros së 23-të në La Liga të Spanjës.
Muriqi ka zënë vend në formacionin e javës pas paraqitjes së mirë që e pati në ndeshjen e fundit të Mallorcas.
Ai shënoi gol nga penalltia kundër Osasunas, ndeshje kjo që përfundoi me rezultatin 1:1 dhe u zhvillua të hënën mbrëma.
Për paraqitjen e tij, Muriqi u vlerësua me notën 8 për të siguruar një vend në ekipin më të mirë të javës.
Goli ndaj Osasunas ishte i pari për Muriqin këtë vit, ndërsa në total këtë sezon ai ka realizuar 4 gola dhe ka bërë 2 asistime në 17 paraqitje kampionale.
Aktualisht, Mallorca renditet e dhjeta në tabelë me 31 pikë të grumbulluara.
