Vedat Muriqi mund të kthehet të luajë në Superligën e Turqisë.
Gjiganti turk, Galatasaray, po mendon fillimisht ta huazojë Muriqin nga Mallorca dhe pas gjashtë muajsh ta blej kartonin e tij.
“A Spor” raporton të hënën se hapat zyrtarë nga Galtasaray pritet të merren në ditët në vijim. Sulmuesi 29-vjeçar iu bashkua Mallorcas në verën e vitit 2022 nga Lazio. Ai më herët në Turqi ka luajtur për Fenerbahçen, rivalin e Galatasarayt, si dhe për Rizesporin, Gençlerbirligin dhe Giresunsporin. Ka luajtur po ashtu në Shqipëri dhe në Kosovë.
Në Turqi raportohet se Muriqi ka tri nënshtetësi – të Kosovës, Shqipërisë dhe Turqisë. Nënshtetësinë e Turqisë e ka marrë në vitin 2015.
Sipas “ajanspor.com” në dokumentacionet turke emri dhe mbiemri i reprezentuesit të Kosovës janë “Vedat Muriç”.
Muriqi së fundi është kthyer nga një lëndim që e mbajti gjatë jashtë fushës. Në 14 ndeshje të edicionit aktual në La Liga të Spanjës ka shënuar katër gola dhe ka kontribuar me dy asistime.
Afati kalimtar në Turqi është i hapur deri më 9 shkurt.
