Sulmuesi i Kosovës, Vedat Muriqi pritet të rikthehet këtë vikend në aksion me fanellën e skuadrës së Mallorcas.
Te Mallorca janë të bindur se Muriqi është rikuperuar plotësisht nga lëndimi dhe do të jetë në fushë prej minutës së parë në ndeshjen kundër Rayo Vallecanos.
Muriqi shkaku i dëmtimit të muskulit në stërvitje i ka munguar Mallorcas në tri ndeshjet e fundit kampionale dhe po ashtu nuk është grumbulluar me Kombëtaren e Kosovës për duelet me Lituaninë dhe Qipron në kuadër të Ligës së Kombeve.
30-vjeçari javën e shkuar i është bashkuar pjesës tjetër të ekipit në stërvitje dhe sipas të gjitha gjasave do t’i prijë sulmit të Mallorcas ndaj Vallecanos.
Dueli Mallorca – Rayo Vallecano luhet të dielën prej orës 14:00 dhe i takon xhiros së 10 të elitës së futbollit spanjoll.
Në fakt, Rayo Vallecano është “viktima” e preferuar e sulmuesit të Kosovës, i cili ka shënuar pesë gola në katër ndeshje të luajtura kundër këtij ekipi.
Muriqi 30-vjeçar këtë sezon ka realizuar 1 gol dhe ka 1 asistim në 6 ndeshje në La Liga, ndërsa Mallorca zë vendin e shtatë në tabelë me 14 pikë të mbledhura.
