Në seancën që po mbahet në Kuvend, Murati tha se pas rritjes së çmimeve është e udhës që ky projektligj të votohet.
“Marrë parasysh edhe gjendjen e vështirësuar ekonomike të qytetarëve, edhe çmimet e rritura, është mëse e udhës që të votohet, të ecet para me këtë projektligj në mënyrë që të hapet rruga për rritjen e pagës minimale. Andaj duke pasë parasysh rëndësinë e këtij ligji dhe rëndësinë e rritjes së pagës minimale për dhjetëra mijëra familje që varen nga kjo pagë, ju ftoj që ta mbështesni”, tha Murati.
Qeveria e Kosovës ka miratuar projektligjin që e cakton pagën minimale në vlerën prej 250 eurosh neto, ose 264 euro bruto.
Paga minimale në Kosovë ishte 170 euro për moshën mbi 35 vjeç e 130 euro nën 35 vjeç dhe nuk ka ndryshuar qysh në vitin 2011. /Teve1.info/
