Ministri në detyrë i Financave, Hekuran Murati, ka thënë se propozimi i kryesuesit të seancës të martën, që për zgjedhjen e kryetarit të Kuvendnit të votohet në mënyrë të fshehtë, nuk ka qenë ndryshim i metodës së votimit.
Ai ka thënë se pas çdo procesi të dështuar të votimit fillon një i ri
“Për ata që po ankohen se sot u ndryshua metoda e votimit në mes të procesit: Jo, nuk po ndryshohet metoda e votimit në mes të procesit. Metoda e votimit po ndryshohet në fillim të procesit. Sa herë që dështon një proces votimi, siç ka ndodhur në seancat e kaluara, rifillon një proces i ri. Prandaj secilën herë, siç edhe e keni vërejtur, në çdo proces të ri, Kryesuesi i seancës e fton përfaqësuesin e partisë fituese, Lëvizja Vetëvendosje, ta propozojë nominimin për Kryetar të Kuvendit”, ka shkruar Murati.
PDK, LDK, AAK dhe Lista Serbe, kanë kundërshtuar propozimit e kryesuesit, Avni Dehari, duke e vlerësuar si shkelje të procedurës.
Propozimi nuk mori votat e mjaftueshme, duke bërë që seanca për konstituimin e Kuvendit të dështojë për të nëntën herë.
