Ministri në detyrë i Financave, Hekruan Murati ka reaguar pas kërkesës së presidentes Vjosa Osmani për heqjen e tarifave për mallrat nga ShBA, një ditë pasi Trump vendosi tarifa për të gjitha shtetet përfshirë Kosovën.
Ai duke thënë se si qeveri kanë shprehur gatishmëri dhe kanë pasur diskutim për marrëveshje për tregti të lirë që nga viti 2023, ka kritikuar Osmanin që siç ka thënë ai 3 minuta pas letrës së fërguar në qeveri, lajmi është bërë publik në rrjetet sociale.
Murati ka thënë se këto tema duhet të trajtohen larg medieve.
“Sot pas orarit të rregullt të punës, në lajme lexova që Presidentja e vendit i paska bërë kërkesë Qeverisë që të pezullojë tarifat ndaj produkteve me origjinë nga ShBA-të. Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë. Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa”, ka shkruar Murati.
Ai ka thënë se qeveria në takime me zyrtarët amerikanë kanë disktuar për një marrëveshje për tregti të litë me Shtetet e Bashkuara të Amerikës.
“Qysh në prill të vitit 2023, gjatë vizitës në Ëashington DC, bashkë me zëvendës kryeministrin Bislimi kemi takuar përfaqësues të Departamentit të Tregtisë, me të cilët kemi diskutuar ndër tjera edhe temën e një marrëveshjeje për tregti të lirë me ShBA-të. Çështja e marrëveshjes për tregti të lirë është përsëritur nga Kryeministri Kurti edhe në takimet që ka zhvilluar me ish ambasadorin amerikan Hovenier. Gatishmëria jonë si qeveri dhe si shtet për të pasur tregti të lirë e pa asnjë barrierë tarifore apo jo-tarifore me Shtetet e Bashkuara të Amerikës, vazhdon të qëndrojë edhe më tej”, ka thënë tutje ai.
Murati ka thënë se vendimin e Trupm për tarifat e kanë disktuar edhe me kryeministrin në detyrë, Albin Kurti, ku ka thënë se në bazë të tarifës së vendosur dhe vëllimin e vogël tregtar, nuk pritet që të ketë ndikim të madh financiar.
“Gjatë ditës së djeshme, kemi diskutuar me Kryeministrin në lidhje me implikimet e mundshme që ka vendimi i Presidentit Trump për vendosjen e tarifave ndaj të gjitha shteteve me të cilat SHBA-të kanë raporte tregtare. Fatmirësisht, Kosova bën pjesë në grupin e shteteve që u është vendosur shkalla tarifore minimale prej 10%. Marrë parasysh edhe vëllimin e vogël tregtar që kemi, impakti financiar i pasjes apo jo të një regjimi tarifor ka ndikim të vogël në ekonominë tonë. Gjithsesi, si partnerë e aleatë të përhershëm, synimi ynë është që të rritet vëllimi i këmbimit tregtar, dhe e mbështesim plotësisht parimin e Presidentit Trump për tregti të lirë e pa barriera dhe fer. Kjo mund të arrihet përmes një marrëveshjeje për tregti të lirë, që do të shërbente edhe si një shkallë shtesë drejt ngritjes e forcimit të marrëdhënieve të forta që tashmë kemi”, ka shkruar ai.
Shfrytëzoj rastin përmes këtij postimi që të njoftoj Presidenten, por edhe qytetarët, që si kabinet qeveritar ne veçse kemi qenë duke e shqyrtuar këtë temë. Dhe kurdo që merret një vendim patjetër që do t’ju njoftojmë me kohë.
Osmani i kërkon Qeverisë që të pezullojë tarifat e importit për produktet amerikane
