Ministri në detyrë i Financave, Hekruan Murati ka folur për raportimet se brenda Grupit Parlamentar të listës së LVV-së, ka kundërshtime për propozimin e Fatmir Limajt kryetar të Kuvendit.
Ai ka mohuar se ka përçarje, duke thënë se ata kanë diskutime dhe se vendimet i marrin me konsensus.
“Sa i përket çështjeve të brendshme të subjektit parlamentar, diskutime ka çdo herë po nuk ka këtu largime, përçarje nuk ka asnjëherë. Diskutimet të brendshme ne i zhvillojmë dhe vijmë me një dakoordim, konsensus, brenda për brenda Grupit Parlamentar”, ka thënë Murati të dielën pas dështimit të përpjekjes së shtatë për konstituim të Kuvendit.
Ai ka thënë se janë të gatshëm për të gjetur një zgjidhje. Murati tha se duhet një marrëveshje politike qoftë edhe për zgjedhje të reja, për të cilat ai tha se nuk janë të interesuar.
