Ministri i Financave, Hekuran Murati, ka thënë se nuk mund të rikuperohet për një mandat çka sipas tij është shkatërruar për 20 vite.
Ai është shprehur se ulja e importit merr kohë derisa të rindërtohet kapaciteti riprodhues, por që ka thënë se deri atëhere do të vazhdojnë të punojnë.
“Normalisht që merr kohë derisa të rindërtohet kapaciteti riprodhues, në mënyrë që të ulët importi. Pra, deri atëherë do të punojmë, mirëpo diçka që është shkatërruar për 20 vite nuk mund të rikuperohet brenda një mandati”, ka deklaruar Murati.
Murati ka shtuar se gjatë qeverisjes Kurti ka pasur dyfishim të eksportit, si dhe ka premtuar se eksporti këtë vit do të shkojë në mbi 900 milionë euro.
“Sa i përket eksportit kur e kemi marrë qeverisjen ka qenë 474 milionë e sivjet pritet të shkojë në mbi 950 milionë euro. Pra kemi dyfishim të eksportit në këtë mandat. Nuk e di se ku po e shihni këtë mosrritje”, ka thënë ai.
Po ashtu, ai ka deklaruar se ekonomia gjatë qeverisjes aktuale s’ka rënë asnjëherë nën 4 përqind rritje, pavarësisht sfidave globale.
“Sa i përket rritjes ekonomike, më lejoni të them që përkundër sfidave globale, ekonomia asnjëherë nuk ka ra nën 4 për qind rritje. Për juve 4 për qind ka qenë mesatarja në kushte normale. Rritja 3-4 për qind që e keni pas ju është për shkak të deficitit”, është shprehur Murati.
Kuvendi i Kosovës është duke mbajtur seancë plenare ku po diskutohet për të vetmen pikë të rendit të ditës që është shqyrtimi i parë i Projektligjit për Buxhetin e Kosovës për vitin 2025.
Buxheti i planifikuar për vitin 2025, është 3.6 miliardë euro./teve1.info/
