Ministri në detyrë i Financave, Hekuran Murati, ka deklaruar se situata me pagat e punonjësve të Radio Televizionit të Kosovës (RTK) është e vështirë dhe se po bëhen përpjekje për të gjetur një zgjidhje, përkundër pengesave të krijuara nga mungesa e komisionit parlamentar.
Murati tha për gazetarët e RTK-së se pagat nuk janë dhënë për shkak të mosformimit të komisionit parlamentar nga partitë ish-opozitare para shpërbërjes së Kuvendit të Kosovës.
“Është situatë tejet e vështirë që të gjithë ato familje të mos marrin paga. Ne gjetëm një mënyrë në muajin gusht, duke përdorur overdraftin, me shpresën që Kuvendi i ardhshëm do të konstituohej dhe do të shlyente mjetet. Por partitë tjera refuzuan kategorikisht të themelonin komisionin, kështu që Kuvendi refuzoi pagat e RTK-së. Po mundohemi të gjejmë një zgjidhje, përmes kursimit, por nuk është e lehtë, sepse kemi edhe KQZ dhe probleme të tjera financiare,” tha Murati.
Ai shtoi se rialokimi i rezervës së buxhetit nuk është i mundur, pasi ajo u shfrytëzua në fillim të vitit për një çështje arbitrazhi që vendi e ka humbur në rastin e Hotel Grand-it.
“Po të ishte vetëm RTK-ja, do të ishte më e lehtë. Por situata është komplekse dhe zgjidhja afatgjatë kërkon llogaridhënie nga partitë e tjera, të cilat ua mohuan pagat punonjësve. Rezerva buxhetore, e cila ishte e alokuar, fatkeqësisht u shfrytëzua në pjesën e parë të vitit, pasi humbëm në arbitrazh. Ka qenë obligim i qeverive të kaluara,” tha Murati.
