Ministri në detyrë i Financave, Hekuran Murati pas dështimit edhe të një seancë për konstituim i Kuvendit ka thënë se tashmë është fakt se partitë opozitare të legjislaturës së kaluar janë të interesuar ta bllokojnë konstituimin e Kuvendit.
Murati ka thënë se sot është dëshmuar që problemi nuk është emri i të propozuarit nga ta.
“Nuk është çështja e emrit kjo u dëshmuar sot. Ata janë të interesuar të bllokojnë pavarësisht ndërrimit të kandidatit. Ofruam kandidat tjetër dhe e pamë që ata funksionojnë bashkë me Listën Serbe, në union të pandashëm”, ka thënë Murati pas përfundimit të seancës.
I pyetur për bashkëpunimin me Nismën Socialdemokrate ai ka thënë se shpreson që të ketë reflektim në këtë drejtim, duke thënë se situata e tillë në Kuvend nuk mund të vazhdojë kështu pafundësisht.
Ai ka thënë PDK, LDK, AAK e kanë lidhur fatin e tyre me Listën Serbe, por deputetët tjerë nuk duhet ta bëjnë këtë.
“Shpresoj që do të ketë reflektim në këtë aspekt, sepse Kuvendit nuk mund të vazhdojë kështu pafundësisht. Nëse PDK, LDK, AAK kanë vendosur ta lidhin fatin tyre me Listën Serbe, unë mendoj që deputetët tjerë nuk do të duhej ta bënin një gjë të tillë. Deputetët do duhej ta kishin interesin e shtetit primar”, ka thënë Murati./teve1.info/
