Murati, megjithëse tha se janë duke monitoruar situatën me organizatat buxhetore, e bëri të qartë se asgjë nuk mund të bëhet pa fillimin e sesionit vjeshtor të punës së Kuvendit, i cili miraton rishikimin.
“Çështja e rishikimit të buxhetit është mundësi, por nuk kërkohet, nuk është e domosdoshme, megjithatë ne jemi duke monitoruar dhe duke shqyrtuar organizatat buxhetore dhe ekzekutimin edhe të projekteve dhe nevojave të tyre, ka disa kërkesa që kemi pasur deri më tani dhe do të shohim siç procedojmë tutje, natyrisht Kuvendi është në pushim dhe nuk është se edhe po të bëhej diçka nga ana e qeverisë do të kishte ndikim për shkak se derisa të kthehet prej pushimit nuk mund të dorëzojmë projektligjin në Kuvend”, tha Murati.
Murati ka folur edhe rreth pakënaqësisë së qytetarëve të Kosovës që pensionistët të paraqiten fizikisht në zyrat Departamentit të Pensioneve për verifikim, duke thënë se kjo është kërkesë ligjore, pavarësisht se pezullimi kishte ndodhur për shkak të pandemisë.
Sipas tij, duhet të sigurohen që pensionet po shkojnë në adresën e duhur.
“Ka qenë një periudhë pezullimi kur kjo kërkesë ligjore ka qenë e pezulluar për shkak të pandemisë, megjithatë marrë parasysh numrin që kemi pa që ka raste shpeshherë ai zinxhiri i raportimit nuk funksionon sa duhet nëpër institucione të tjera dhe nëpër disa komuna ose regjione, e kemi pa të nevojshme që të rikthejmë edhe një herë që të bëhet një ri-shoshitje dhe të sigurohemi që numri i pension-marrëseve të jetë i saktë”, tha ndër të tjera Murati.
Ai tha se për pensionistët me probleme shëndetësore verifikimi kryhet nga ekipet mobile, ndërsa për pensionistët që lajmërohen më vonë, pagesa e pensionit do t’ju bëhet në mënyrë retroaktive.
