Ministri në detyrë i Financave, Hekuran Murati, ka reaguar lidhur me vendimin e Gjykatës Supreme, e cila sot ka publikuar aktgjykimin për shfuqizimin e një neni të Udhëzimit Administrativ për Veteranët e Luftës së UÇK-së.
Në një postim në Facebook, Murati ka theksuar se ky udhëzim ishte miratuar në vitin 2015, gjatë Qeverisë së koalicionit PDK-LDK.
Ai bëri të qartë se nuk bëhet fjalë për shfuqizimin e ndonjë Udhëzimi Administrativ të miratuar gjatë mandatit të Qeverisë Kurti.
“Prandaj ftoj edhe mediat të përmbahen nga raportimet tendencioze që gabimisht tentojnë ta prezantojnë këtë si vendim të Gjykatës që shfuqizon ndonjë akt nënligjor të Qeverisë Kurti”, shkroi ai.
Murati theksoi gjithashtu se ishte pikërisht kryeministri në detyrë Kurti ai që paralajmëroi se kufizimi i punësimit për Veteranët e Luftës së UÇK-së do të hiqet.
Ai sqaroi më tej përmbajtjen e nenit të kontestuar të Udhëzimit Administrativ dhe arsyet e shfuqizimit nga Gjykata Supreme.
“Ai nen parashihte që për të aplikuar për benefitin e Veteranit të UÇK-së, ndër të tjera, duhej dorëzuar edhe dëshmia nga ATK që veterani nuk ishte i punësuar. Supremja e shfuqizoi sepse e konsideroi se bie ndesh me Nenin 16A të Ligjit të ndryshuar/plotësuar për Veteranët e Luftës së UÇK-së, ndryshim ky i bërë në vitin 2017, gjatë qeverisjes së koalicionit PDK-LDK. Neni 16A parashihte kategorizimin e veteranëve në tri kategori sipas periudhës së pjesëmarrjes në luftë dhe, pas përfundimit të këtij kategorizimi, mundësinë që veteranët që punojnë jashtë sektorit publik të përfitojnë 50% të shumës së benefitit sipas kategorisë përkatëse. Interpretimi mbizotërues deri tani ka qenë se parakushti për përfitimin e këtij paragrafi është përmbyllja e kategorizimit sipas Nenit 16A”, theksoi ai.
Në fund, Murati bëri të ditur se zyra ligjore e Ministrisë së Financave dhe Transfereve Publike do të analizojë nëse aktgjykimi i Supremes është i mjaftueshëm që t’u mundësojë veteranëve që punojnë jashtë sektorit
“Ne do të analizojmë me zyrën ligjore në MFPT nëse Aktgjykimi i sotëm i Supremes është i mjaftueshëm që t’u mundësohet përfitimi i benefitit edhe Veteranëve të UÇK-së që punojnë jashtë sektorit publik, edhepse kategorizimi i paraparë sipas Nenit 16A nuk është bërë deri më tani, apo nëse ka nevojë për ndryshime ligjore shtesë të cilat edhe ashtu kanë qenë në plan. Sido që të jetë, Kryeministri Kurti tashmë e ka dhënë zotimin publik, dhe ne do të punojmë për ta jetësuar atë zotim sa më parë”, ka përfunduar Murati.
Ndryshe, Gjykata Supreme e Kosovës e ka shfuqizuar të martën një nen të një udhëzimi administrativ, i cili u kërkonte veteranëve të Ushtrisë Çlirimtare të Kosovës të paraqisnin dëshmi se nuk ishin në marrëdhënie pune për të përfituar nga pensioni.
Udhëzimi Administrativ Nr. 01/2025 i Ministrisë së Financave, Punës dhe Transfereve (MFPT) kishte vendosur si kusht që veteranët, për të përfituar kompensim financiar, duhet të dëshmonin me dokument nga Administrata Tatimore e Kosovës se nuk janë të punësuar.
Gjykata Supreme ka vendosur se ky kusht është i paligjshëm, sepse ligji në fuqi, neni 16A, paragrafi 5, nuk ua ndalon veteranëve që janë të punësuar në sektorin privat të përfitojnë nga pensioni.
Sipas ligjit, vetëm ata që janë të punësuar në institucione publike ose ndërmarrje publike, pra që paguhen nga buxheti i shtetit, përjashtohen nga përfitimi.
