Ministri i Financave, Hekuran Murati ka thënë se dita e mërkurë ishe ditë e veçantë me rastin e nënshkrimit të vendimit përfundimtar për liberalizimin e vizave.
Ai tha se është diçka që pushtetet e kaluara nuk kishin arritur ta bënin për një dekadë, u bë për dy vite qeverisje, shkruan teve1.info
“Është normale që sot, për shumë qytetarë kjo arritje edhe duket e pabesueshme, dhe ende e shohin me skepticizëm. Sepse me vite të tëra, garda e vjetër premtoi e mashtroi në emër të vizave. Madje u fal edhe tokë në emër të vizave dhe vizat prapë nuk erdhën.
Por ja që më në fund ndodhi. Dhe qytetarët e vendit janë më meritorët për durimin dhe për besimin në ndryshim. Prandaj le t‘i gëzohemi kësaj dite!”, ka shkruar Murati në Facebook.
Ndryshe, Parlamenti Evropian të martën ka miratuar vendimin final për liberalizimin e vizave për Kosovën.
Liberalizimi i vizave do të hyjë në fuqi në datën e funksionalizimit të sistemit ETIAS por jo më vonë se 1 janari 2024, pra, edhe nëse ky sistem nuk hyn në funksion deri në atë datë.
Sipas rregullave të Parlamentit Evropian, liberalizimi i vizave nënkupton që qytetarët e Kosovës do të kenë kohë të qëndrojnë 90 ditë në Zonën Shengen, në një periudhë prej 180 ditësh.
