Ministri i Financave, Hekuran Murati ka thënë se vetëm për tre vite qeverisje buxheti i komunave është rritur për 200 milionë euro.
Këtë deklaratë ai e bëri gjatë konferencës pas mbledhjes së Qeverisë, derisa theksoi se së fundmi si Ministri kanë dorëzuar edhe harkoren e dytë për komunat.
“Së fundmi e kemi dorëzuar harkoren e dytë për komunat, janë 742 milionë euro buxhet për komunat do të thotë edhe këtu duhet të shtohet kjo sepse po thuhet po dëmtohen komunat. Do me thënë për vetëm 3 vite e kemi rritë për 200 milionë euro buxhetin e komunave, do të thotë kanë buxhet 200 milionë euro më shumë dhe as që bëhet fjalë për dëmtim, është e kundërta. Ka mënyra institucionale të komunikimit dhe të përcaktimit të kufijve buxhetor”, tha Murati.
Madje ministri i Financave, tha se për dallim nga qeveritë e kaluara ku ministrat dhe kryetarët e komunave të cilët kanë qenë të një partie politike kanë pasur komunikim më të veçantë, në qeverisjen e tashme nuk ekziston një gjë e tillë, pasi sipas tij, të gjitha komunat janë të barabarta dhe e kanë mënyrën institucionale të komunikimit me Ministrinë e Financave.
“Nëse në të kaluarën ka pasë ministra që kryetarët e caktuar të komunave që kanë qenë në të njëjtën vijë partiake i kanë taku pak më shpesh, e kanë bë si të them përjashtime për kryetar të caktuar, kjo praktikë nuk ekziston tashmë. Do me thënë të gjitha komunat janë të barabarta dhe të gjitha e kanë mënyrën e komunikimit institucional me Ministrinë e Financave “, shtoi Murati./teve1.info./