Ministri i Financave dhe anëtari i Lëvizjes Vetëvendosje, Hekuran Murati, ka deklaruar se vetëm LVV-ja ka shprehur qëndrim të qartë për zgjedhjen e një nënkryetari të Kuvendit nga komuniteti serb që nuk vjen nga Lista Serbe.
Në një prononcim publik, Murati ka theksuar se Vetëvendosje ka ftuar të gjitha partitë opozitare – PDK, LDK dhe AAK – që të mbështesin këtë nismë, por deri tani nuk ka pasur asnjë përgjigje pozitive nga to.
“Deri më tani vetëm Lëvizja Vetëvendosje është deklaruar për përcaktimin që për postin e nënkryetarit të Kuvendit, që sipas Kushtetutës duhet të vijë nga komuniteti serb, të zgjidhet dikush që nuk vjen nga Lista Serbe. Gjithashtu, ne i kemi ftuar edhe partitë tjera PDK/LDK/AAK që të na bashkohen në këtë nismë. Por deri më tani nuk kemi pranuar ndonjë përgjigje pozitive,” ka deklaruar Murati.
Ai ka shtuar se mungesa e përkrahjes nga këto parti opozitare tregon, sipas tij, një gatishmëri të tyre për bashkëpunim të mëtejshëm me Listën Serbe.
“Qëndrimi për temën e nënkryetarit e tregon më së miri se cilat parti ende presin dhe shpresojnë për bashkëpunim me Listën Serbe, e ato janë PDK, LDK dhe AAK,” u shpreh Murati.
Çështja e përfaqësimit të komunitetit serb në udhëheqjen e Kuvendit mbetet një temë e ndjeshme politike, e cila po vazhdon të shkaktojë ndasi mes pozitës dhe opozitës.
