Ministri i Financave, Hekuran Murati, ka bërë thirrje bashkatdhetarëve që të mos paguajnë për sigurimin kufitar. Murati përmes një postimi në Facebook ka ritheksuar se policat kufitare janë të mbuluara nga Qeveria e Kosovës.
Sipas Muratit, disa punonjës të Byrosë Kosovare të Sigurimit nuk informojnë saktë që polica kufitare është e subvencionuar, dhe po i detyrojnë mërgimtarët të paguajnë, shkruan teve1.info
“Policat kufitare për vetura deri në 9 pasagjerë janë të mbuluara nga Qeveria, dhe nuk ka nevojë të paguhet për to, kur hyni në pikat kufitare. Kemi raportime nga disa bashkatdhetarë se punonjës të papërgjegjshëm të Byrosë Kosovare të Sigurimit nuk informojnë saktë që polica kufitare është e subvencionuar, dhe madje edhe i detyrojnë bashkatdhetarët që të paguajnë për së dyti, për polica që tashmë janë të paguara nga Qeveria”, ka shkruar Murati në Facebook.
Tutje, ai ka ftuar të gjithë ata bashkatdhetarë që janë ballafaquar me raste të tilla, ku u është kërkuar të paguajnë për policën kufitare e që do duhej ta merrnin falas, që rastet t’i raportojnë tek policia në numrin 192.
“Disa raste tashmë janë raportuar dhe kemi pasur edhe procedimin penal për punonjësit e BKS-së. Njëkohësisht ftoj edhe Policinë e Kosovës dhe Prokurorinë që t’i trajtojnë me prioritet këto raste të keqpërdorimeve”, deklaroi Murati.
Ndryshe, nga data 1 korrik ka nisur subvencionimi i policës kufitare për bashkatdhetarët që vijnë në Kosovë.
