Ministri i Financave, Hekuran Murati i ka regjur shefit të Grupit Parlamentar të AAK-së, Besnik Tahiri, për pagën minimale, i cili e akuzoi Qeverinë se paga është rritur më s shumti për kabinetin qeveritarë dhe të emëruarit politik, raporton teve1.info
Në seancën e Kuvendit të Kosovës, ministri Murati tha se ky ligj për më shumë se një vit është sjellë në Kuvend, por sipas tij është vonuar për shkak të pengimit në votim nga partitë opozitare.
“Sa i përket pagës minimale, më lejoni t’ju rikujtoj se paga minimale ka një vit e ca që ne kemi sjellë në Kuvend, si qeveri. Është vonuar pikërisht në Kuvend, sepse opozita ka penguar votimin e pagës minimale. Megjithatë në korrik të vitit të kaluar, ligji që mundëson rritjen e pagës minimale ka kaluar në këtë kuvend. Mirëpo është një subjekt politik që ka dërguar në Gjykatën Kushtetuese për ta penguar rritjen e pagës minimale”, deklaroi ministri Murati.
Paraprakisht, shefi i Grupit Parlamentar të AAK-së, Besnik Tahiri, kërkoi që paga minimale në Kosovë të jetë 400 euro, derisa e kritikoi Qeverinë se me ndryshimin fundit të Ligjit të Pagave, më së shumti ka përfituar Qeveria.
