Kryetari i Lëvizjes për Bashkim, Valon Murati duke folur për zhvillimet në veri dhe deklarimet e Qeverisë për shtrirje te sovranitetit atje, ka thënë se çështja e veriut të Mitrovicës zgjidhet vetëm me mjete të pastra politike.
Ai ka thënë se problemi nuk është trajtuar asnjëherë në thelb dhe për tu bërë kjo do duhej të trajtohej çështja e Luginës së Preshevës.
“Veriu nuk mund të zgjidhet me mjete policore, gjyqësore e sundim të ligjit por vetëm me mjete të pastra politike. Asnjëherë nuk është trajtu në themel problemi dhe për tu trajtu është dashur të merret edhe çështja e Luginës së Preshevës. Në vitin 2018 administrata amerikane ishte e interesuar që ta mbyllte çështjen e Kosovës me Serbinë duke e promovuar idenë e ripërcaktimit të kufijve”, tha ai në emisionin “InfoNata” në Tëvë 1.
Murati ka thënë se kryeministri Kurti nuk ka dalluar nga të tjerët në tavolinë e bisedimeve.
Madje sipas tij edhe veprimet e fundit të Kurtit janë për t’i ikur Asociacionit.
“Kurti në tavolinën e bisedimeve u ngjau të gjithë kryeministrave të kaluar, asnjëherë nuk bë përpjekje të futet në agjendë çështja e Luginës së Preshevës. Dhe nëse ti flet vetëm për serbët kanë me tu ofruar vetëm opsione për serbët. Kurti ka bërë të gjitha makinacionet e mundshme dhe po i bënë për ti ikë Asociacionit”, ka thënë Murati.
