Murati kundër uljes së akcizës dhe TVSH-së, paralajmëron vendim “që cakton çmim tavan dhe marzhë maksimale të fitimit

Ai ka thënë se një veprim i tillë nuk u shpërben interesave të qytetarëve, por sipas tij vetëm sa do të trashte fitimet e tregëtarëve.

“Thirrjet e opozitës që Qeveria të ulë TVSH-në apo akcizën në naftë ose produkte tjera, nuk i shërbejnë interesit të qytetarëve. Përkundrazi, një veprim i tillë vetëm sa do të trashte fitimet e tregtarëve në njërën anë, dhe do të kufizonte mundësitë e shtetit që t’i mbështesë familjet në nevojë në anën tjetër”, ka shkruar Murati në Facebook, transmeton teve1.info.

Ai ka thënë se Qeveria e Kosovës është dukue punuar për të stabilizuar çmimet.

“Që nga marrja e mandatit, ne si Qeveri nuk kemi ngritur as edhe një taksë të vetme. As TVSH-në, e as akcizën e naftës. Me fjalë tjera, nuk ka as edhe një veprim të vetëm të qeverisë që do të kishte ndikuar në rritjen e çmimit të naftës. Rritja e çmimit të naftës vjen si rezultat i rritjes së çmimit të furnizimit nga importi, që është jashtë kontrollit tonë, por edhe për shkak të rritjes së marzhës së fitimit nga tregtarët e naftës, sidomos tani kur pritet ardhja e mërgatës”.

“Prandaj po punojmë për një vendim që cakton çmim tavan dhe marzhë maksimale të fitimit, sepse në situata të tilla të jashtëzakonshme, është e domosdoshme që Qeveria të ndërhyjë në treg për stabilizuar çmimet, gjë që parashihet edhe me legjislacionin në fuqi”, ka shkruar Murati.

Çmimet e naftës sot në Kosovë kanë shkuar deri në 1.90 euro për litër, ndërsa që opozita ka kërkuar që të hiqet akciza për derivatet dhe të ulët TVSH-ja për çmimet e produkteve esenciale.

LDK ka paralajmëruar se për këtë gjë do të thërrasë debat në Kuvend dhe do të propozojë miratimin e një rezolute.