Ministri i Financave dhe Transferëve, Hekuran Murati ka thënë se meq sa ka informacion vendimi i kaluar i Gjykatës Themelore e obligon Zyrën e Rregullatorit të Energjisë, të gjejë mekanizim për kthimin e parave të qytetarëve të Kosovës, të cilëve padrejtësisht i është faturuar shpenzimi i energjisë për këtë komunat veriore, të banuara me shumicë serbe.
Ai i pyetur për vendimin e fundit të Gjykatës Supreme, e cila ka konstatuar se qytetarëve i është faturuar pagesa e energjisë për atë pjesë të vendit në mënyrë të pa drejtë, ka thënë se i takon gjykatës dhe ZRrE-së të jap shpjegime.
Murati ka thënë se Qeveria është e gatshme të ndihmojë që të gjendet mekanizma për zbatim sa më të lehtë të këtyre vendimeve.
“Nëse s’gaboj vendimi i kaluar i Gjykatës Themelore ka obliguar ZRrE-në të gjej mekanizimin për tu kthyer qytetarëve këto mjete dhe konsideroj se kjo pyetje duhet shtruar Gjykatës që e ka marrë vendimin qofte edhe ZRrE-së. Ne si Qeveri çdo herë jemi të gatshëm për të mbështetur qytetarët apo mekanizmat tjerë që të gjejmë zbatim sa më të lehtë të masave apo vendimeve të tilla”, ka thënë Murati të mërkurën, raporton teve1.info.
Gjykata Supreme e ka refuzuar si të pabazuar kërkesën për rishqyrtim të jashtëzakonshëm të vendimit gjyqësor të parashtruar nga Zyra e Rregullatorit për Energji, kundër aktgjykimit të Gjykatës së Apelit.
Sipas Supremes nuk janë të qëndrueshme pretendimet lidhur me arsyetimin e mosinkasimit në katër komunat e veriut me shkaqe sigurie dhe mospasjes qasje në leximin e njehsorëve në atë pjesë, sepse Supremja konsideron se nuk justifikohet që qytetarët tjerë për këto arsye të ngarkohen me pagesën e energjisë elektrike të harxhuar pa një bazë ligjore.
Prandaj, sipas Gjykatës Supreme, me këtë faturim dhe pagesë është bërë trajtim jo i barabartë i qytetarëve të Kosovës, e që bie ndesh me nenin 55 paragrafi 4 i Kushtetutës, trajtim i pabarabartë, të cituar si në aktgjykimet e gjykatave të instancave më të ulëta, sepse është bërë kufizim i të drejtave të njeriut.
“Andaj bazuar në nenin 194 të LMD, konsumatorët, të cilët pa bazë ligjore dhe pa dijeninë e tyre janë faturuar dhe kanë paguar për energjinë e shpenzuar në veri, u lindë e drejta për kthimin e shumës së paguar si kanë vendosur gjykatat e instancave më të ulëta”, thuhet në vendimin e Supremes.
Që nga pas lufta qytetarët e pjesës tjetër të Kosovës kanë paguar faturat e energjisë elektrike edhe për qytetarët në katër komunat veriore të vendit./teve1.info/
