Kryetari i Lëvizjes për Bashkim, Valon Murati, thotë se politikat që vijnë nga Uashingtoni, Kosovës i pëlqejnë apo jo, duhet të gjenden kanale të komunikimit për t’i trajtuar ato.
Murati në emisioni “Info Nata”, tha se është krejtësisht joserioze të thuhet që i dërguari i posaçëm i Shteteve të Bashkuara për Ballkanin Perëndimor, Gabriel Escobar, po vjen dhe po sjellë kërkesat e Serbisë.
“As Escobar, as ambasadori Hill, as ambasadori Hovenier nuk kanë politika personale, nuk ndërtojnë politika personale. Ato janë politika të Uashingtonin, të cilët ata vijnë edhe i përçojnë. Nëse neve nuk na pëlqejnë ato, ne duhet t’i gjejmë kanalet e komunikimit edhe me Uashingtonin për t’i trajtuar ato problematika. Është krejtësisht joserioze të thuhet që emisari special po vjen dhe po na sjellë kërkesat e Serbisë, kjo është për t’i hedhë sy opinionit, popullit. Normalisht është populliste, është në funksion të ndërtimit të një figure të një njeriu që po përpiqet të përballet me krejt botën, me krejt kauzat e drejtësisë, etj. Por, në realitet është e dëmshme për vendin, Kosovën mund të jetë e dobishme në planin afat shkurtër për kryeministrin”, tha ai në Tëvë1.
Për deklaratën e ambasadorit amerikan në Serbi, Christopher Hill, i cili tha se kemi problem me kryeministrin Kurti, Murati thotë se politika amerikane ka qasje në raport me rajonin.
“Raporti i Kosovës dhe Serbisë, raportet në marrëdhëniet shqiptaro-serbe në Ballkan janë të kushtëzuara edhe nga një kontekst pak më i gjerë, pra ne nuk mund ta shohim këtë vetëm të izoluar këtë raport tonin. Sigurisht që politika amerikane, evropiane, krijohet dhe ka qasje në raport me rajonin edhe duke u nisur nga këto zhvillime që po ndodhin. Është krejtësisht e thjeshtë për ta kuptuar, që në këto zhvillimet dinamike të fundit, deri në këtë acarimin, deri në rrezik të konfliktit midis perëndimit dhe Rusisë, për shkak të konfliktit në Ukrainë, ballkoni merr një dimension krejt tjetër në sy të perëndimit”, shtoi ai. /teve1.info/
