Ministri i Financave, Hekuran Murati i është përgjigjur deputetit Driton Selmanaj i cili tha se vitin që lamë pas, në Kosovë janë rritur aplikimet për vizë në shtete tjera dhe numri i personave që kanë hequr dorë nga shtetësia.
Murati tha se e “kupton që si opozitë dëshironi të zbrazet Kosova, vetëm t’ia faturoni kësaj Qeverie”
“Mirëpo trendet tregojnë diçka tjetër. Pra, ju lus që sa herë folni me statistika të merrni statistika për një periudhë më të gjatë kohore”, tha Murati.
Sipas Muratit personat që ndërrojnë shtetësi e bëjnë këtë sepse Gjermania nuk ua lejon edhe shtetësinë kosovare edhe gjermane.
“Çështja e heqjes dorë nga shtetësia ka të bëjë kryesisht me personat që migrojnë në shtetin gjerman sepse nuk lejohet dyshtetësi, pra duhet të heqin dorë nga njëra shtetësi. Por për të arritur deri te moment për të hequr dorë nga shtetësia duhen së paku dy vite. Pra, që të pajiset me shtetësinë gjermane në mënyrë që të heq dorë nga shtetësia e Kosovës. Pra të gjitha këto raste që ju po pretendoni se po ndodhin kanë nisur më herët se para 5 viteve”, ka thënë Murati.
Sipas tij trendi nuk ka ndryshuar dhe Selmanaj po manipulon.
“E dyta, shihe trendin. Nëse trendi ka qenë 5000 persona në vit heqin dorë nga shtetësia, ai trend vazhdon të jetë i njëjtë. Mos thuni dy vitet e fundit kanë hequr dorë 10 mijë persona, nëse për çdo vit kanë heq dorë 5000 persona nga nënshtetësia. Po, ka pas krizë dhe jemi ballafaqu me shumë kriza. Kemi pas pandeminë, inflacionin dhe tash kriza e normave të interesit. Dhe megjithatë rritjen mesatare ekonomike e kemi më të lartë se në çdo vit tjetrin kur s’ka pasë fare krizë”, ka shtuar Murati.
https://teve1.info/lajmet/selmanaj-105-mije-aplikime-per-vize-ne-ambasaden-e-gjermanise-me-2022/
