Ministri në detyrë i Financave, Hekuran Murati ka thënë se Komuna e Prishtinës ka shpallur tenderë në vlerë prej 16.5 milionë eurove që grumbullimin e mbeturinave t’ia japë një kompanie tjetër.
Murati përmes një postimi në Facebook ka akuzuar Ramën rreth buxhetit komunal, duke thënë se komuna po abuzon me paratë e taksapaguesve si dhe se po çon drejt falimentimit të ndërmarrjes publike e largimin nga puna të qindra punëtorëve.
“Komuna e Prishtinë dhe Përparim Rama ka shpallur tender në vlerë prej 16.5 milionë eurove që grumbullimin e mbeturinave t’ia japë një kompanie private. Kjo përkundër faktit që Komuna e Prishtinës ka Ndërmarrje Publike për grumbullimin e mbeturinave. Pra, diçka që mund të kryhet nga Ndërmarrja Publike me pak më shumë bashkëpunim e koordinim, po tentohet t’i jepet një kompanie private, për 16.5 milionë euro.Ky është abuzim flagrant i parave të taksapaguesve, sepse po shpenzohet për një shërbim i cili tashmë ofrohet nga një ndërmarrje publike. Për më tepër, kjo nënkupton edhe falimentimin e ndërmarrjes publike dhe largimin nga puna të qindra punëtorëve. Ku është prokuroria për këtë rast?”, ka shkruar ai./teve1.info/
