Ministri i Brendshëm, Xhelal Sveçla ka deklaruar se procesi i ndërrimit të targave ilegale në ato RKS është i pandalshëm.
Por Drejtori i Organizatës AKTIV, Miodrag Miliceviq, thotë se po sheh pak vullnet nga qytetarët serb që jetojnë në veri të vendit, ti ndërrojnë targat.
“Deri më tani po shoh se pak qytetarë kanë vendosur t’i riregjistrojnë targat e makinave. Me sa kam informata deri më tani vetëm 10 qytetar në veri të vendit kanë vendosur ta bëjnë një veprim të tillë. Shpresoj shumë që të arrihet një marrëveshje dhe të mos krijohen tensione. Duke parë edhe situatën në Ukrainë, nuk është shumë mirë që të shohim trazira edhe në vende të tjera. Nëse nuk arrihet një marrëveshje mes palëve të involvuara në dialog, atëherë qytetarët do ta pësojnë”,tha Miliceviq.
Edhe aktivisti tjetër i shoqërisë civile, Igor Markoviq, i cili jeton në Mitrovicën e Veriut, nuk po sheh vullnet nga qytetarët serb që t’i riregjistrojnë targat e tyre në RKS.
“Me aq sa kam parë nuk ka vullnet të madh nga qytetarët në veri të vendit t’i ndryshojnë targat. Çështja tjetër që mendoj se nuk është analizuar mirë, ka të bëjë me faktin se brenda dy muajve është e vështirë të përfundoj ky proces. Janë mbi 8.000 makina, edhe për dy muaj matematikisht nuk është e mundur që të zëvendësohen targat në RKS. Video-mesazhi qe u publikua nga Kryeministri Kurti dhe Ministri i brendshëm, Xhelal Sveçla, ishte nje gjest i mirë por ishte edhe sarkastik. Mendoj se ata nuk përçuan një mesazh si duhet tek komuniteti serb që jeton në Kosovë”, tha Markoviq.
Targat që përmbajnë akronime serbe të qyteteve të Kosovës, do të konsiderohen të paregjistruara pas 31 tetorit.
Kronika e gazetarit Shpat Blakçori.
