Që nga dita e martë, çdo raport mjekësor lëshohet vetëm në këtë formë.
Kjo pasi Qendra e Mjekësisë Familjare në Malishevë, ka mbetur pa printerë.
Kompania e cila ka fituar tenderin për dhënien me qira të këtyre pajisjeve, pas skadimit të kontratës ka tërhequr printerët.
E një gjë e tillë, sipas drejtorit të QKMF-së në Malishevë është bërë pa asnjë paralajmërim.
“Kam pranuar një thirrje nga punëtorët që punojnë në sistemin informativ shëndetësor (SISH), me thanë që ka ardhur kompania “Art House” dhe ka marrë printerët pasi i ka ndërpre kontratën me Ministrinë e Shëndetësisë, unë nuk kam asnjë informatë që Ministria e Shëndetësisë ka shkëputur kontratën. Unë menjëherë hyra në email mos rastësisht mos nuk e kam parë, por jo nuk kishte asnjë email”, ka thënë Afrim Krasniqi- drejtor i QKMF-së në Malishevë.
Mungesa e printerëve, po shkakton vështirësi në dhënien e shërbimeve mjekësore këtu në Malishevë.
“Ne nuk mund të mos e përdorim printerin për arsye e kemi sistemin informativ shëndetësor që me patjetër duhet të jetë printeri këtu, pa asnjë lajmërim neve na janë marrë të gjithë printerët. Ne për vizita dhe raporte mjekësore e kemi edhe sistemin që mund të lëshojmë me dorë, mirëpo sa i përket analizave, laboratorit dhe pjesë së radiologjisë ata patjetër duhet me pas raportin për shkak të printerit”, ka thënë Daradan Bytyqi-specializant i Mjekësisë Familjare.
Por jo vetëm në këtë qytet, printerët, kompania “Art House” i ka tërhequr edhe në QKMF-të tjera ku e kishte më herët kontratën.
E sipas drejtorit të këtij operatori ekonomik, një gjë e tillë është bërë pasi që nga fundi i muajit shkurt ka skaduar kontrata.
“Kontrata ka skaduar në fund të muajit Shkurt 2024 dhe tash kontratën e ka një operator ekonomik tjetër pra nuk është ndërprerë, por ka përfunduar. Pajisjet janë pronë e kompanisë tonë, prandaj ne jemi duke i tërhequr në të gjitha pikat dhe Ministria është e informuar për këtë çështje”, ka thënë Blin Zeqiri –drejtor i kompanisë “Art House”
Kompania në fjalë që nga viti 2018, kishte marrë tender me vlerë 1 milionë e 800 mijë euro nga Agjencia Qendrore e Prokurimit, që të jap në shfrytëzim me qira fotokopje dhe printerë.
AQP kësaj radhe me këtë tender e ka shpërblyer kompaninë Rikon, me vlerë 741 mijë euro.
Por nga Ministria e Shëndetësisë e as nga Agjencia Qendrore e Prokurimit nuk i kanë kthyer përgjigje televizionit se kur do të dërgohen printerët në QKMF-të.
