Autore: Adea Mustafaj
Paga të pakënaqshme e mungesë të sigurimit shëndetësor.
Këto konsiderohen se janë dy nga faktorët që po ndikojnë në ikjen e punëtorëve nga Kosova.
Por si ndikon kjo në ekonominë kosovare?
“Veç se kemi mungesë të fuqisë punëtore, kemi mungesë të konsumit. Njëherit kjo do të ndikojë tek aktiviteti biznesor, sepse biznesi, përveç që duhet me pas thjesht punëtorë ta zhvillojë aktivitetin biznesor, njëherësh ka mungesë edhe të konsumit, sepse duhet dikush të blejë ato çfarë prodhon ose ja ofron biznesi. Por për fat jo të mirë, shifër në vazhdimësi, por edhe me këto pesë vitet e fundit ka pas mungesë të theksuar të politikave ekonomike, që ka rezultuar, do të thotë, me uljen e aktivitetit ekonomik, me shuarjen e biznesit dhe rritjen e gatishmërisë së punëtorëve për t’u larguar nga vendi”, thotw Mustafë Kadrijaj -ekonomist.
Edhe sipas drejtorit ekzekutiv të Dhomës së Tregtisë dhe Industrisë Kosovë, Kushtrim Ahmeti, në ikjen e punëtorëve po ndikojnë kushtet më të favorshme që po ofrojnë vendet e tjera.
Por, sipas tij, ka edhe raste kur kthehen punëtorët, vetëm se duhet të ketë një bashkëpunim më të mirë në mes institucioneve dhe shoqatave të bizneseve.
“Ka edhe raste që janë kthyer prap. Kanë shku e kanë pa që s’kanë mujt e kanë pa që ju ka dal shumë ma shtrejt atje se këtu janë kthy. Kemi kompani këtu që punojnë persona shqiptare që janë rrit në Gjermani por vijnë me punu në Kosovë sepse kanë gjete mundësin ma të mirë, kanë taksa më të lira se sa e kanë në Gjermani dhe gjitha kostja e jetës për ta duke pas parasysh pagat që i marrin janë shumë më të mira. Kjo krejt varet pastaj prej fuqisë që e ka biznesi dhe ofrimin e shërbimeve që e ofron biznesi. Por gjithë kejo besoj që do të ishte rregullu po të kishte një bashkëpunime më të mirë në mes institucioneve në këtë rast dhe vetë shoqatave të bizneseve”, thotë Kushtrim Ahmeti, drejtor ekzekutiv i Dhomës së Tregëtisë dhe Industrisë.
E nga Aleancës Kosovare të Bizneseve thonë se ju kanë bërë thirrje bizneseve që t’i përmirësojnë kushtet e punës në mënyrë që të mbajnë forcën e punës aktive në Kosovë.
“Punëtorët tanë një numër i madh, dhe statistikat tregojnë që neve nga viti në vit na ikin rreth 50 mijë të tillë për të gjetur një vend pune më të mirë në Bashkimin Evropian. Prandaj ne si Aleancë e Biznesit kemi bërë thirrje tek bizneset t’i rrisin pagat, kushtet e punës dhe trajtimi i punëtorëve të bëhet më i mirë. Po ashtu kemi ndikuar që të rritet paga minimale në tërë Kosovën me të vetmen qëllim që të mbajmë forcën e punës aktive në Kosovë. Por prapë se prapë ka mungesë të punëtorëve, sepse punëtorët tash janë secili duke shikuar standardin më të mirë, jetën më të mirë ku t’i gjejnë”, shprehet Agim Shahini.
Sipas Shahinit, pjesa dërmuese e punëtorëve largohen për në vendet evropiane, kryesisht në Gjermani, pasi siç thotë ai, ky vend ka kërkesa të mëdha për fuqi punëtore.
