Haliti tha se në komision ka obligim të ardhjes ministrja Gërvalla dhe jo ekspertë të ndryshëm që s’kanë përfaqësim politik. “Në komisione e ka obligim ministrja me ardhë, jo ekspertët. Mund të shqyrtojmë ligjin, të amandamentojmë dhe pranojmë, por ne nuk jemi komision teknik i qeverisë, ne jemi kontroll i qeverisë. Në komision për me prezantu ligjin duhet me ardhë ministrja, unë nuk pranoj me bisedu me teknikë, pasi ata janë për të përpunuar ligjin që iu dërgon ministrja”, ka deklaruar ndër të tjera Haliti, shkruan Kosovapress.
Mirëpo, kryetari i Komisionit për Punë të Jashtme, deputeti i LVV-së, Haki Abazi, tha se formimi i këtij grupi punues ka për qëllim që i njëjti të jetë funksional dhe i zbatueshëm. “As ne nuk kemi marrë obligim ndaj grupit punues brenda ministrisë, ne kemi bërë grup punues të deputetëve që kanë me ndjek çështjen. Në fund, qëllimi kryesor është që të del ligj i mirë, i zbatueshëm dhe funksional”, theksoi ai.
Në debat u përfshi edhe deputetja tjetër e LVV-së, Fitore Pacolli, e cila tha se kjo praktikë ekziston edhe në komisione tjetra parlamentare.
Me gjithë kundërshtimet e deputetit Haliti, komisioni u pajtua për formimin e grupit punues për Projektligjin për zbatimin e sanksioneve financiare ndërkombëtare të shënjestruara./teve1.info
