Deputeti i Vetëvendosjes, Armend Muja ka thënë se tash e tutje, me kryetarin e zgjedhur të Mitrovicës së Veriut, Erden Atiq, vendimet për këtë komunë do të mirren në asamble, ndryshe nga e kaluara kur sipas tij janë marrë në Rashkë të Serbisë.
“Është krijuar një traditë që vendimet për komunat veriore zakonisht kanë shku në Rashkë, atje janë dakorduar dhe më pastaj kanë ardhur me vendime të kryera nën komandën e Vuçiqit. Besoj që këtë herë do të mësohemi me idenë që vendimet për komunën veriore të Mitrovicës të merren në asamblenë e Mitrovicës së Veriut”, ka thënë Muja.
Ai nuk beson që në këtë komunë do të ketë problem me shfrytëzimin e hapësirave të saj.
“Unë besoj që aty nuk kemi problem, objekti komunal ka qenë nën shfrytëzim edhe nga Asambleja edhe nga kryesuesi i kuvendit. Nuk besoj që do të ketë problem por nëse ka i bëj thirrje të gjithë organeve të rendit që të gjithë ata që guxojnë ose tentojnë ta shkelin ligjin ose vullnetin demokratik dhe rendin juridik të Kosovës, duhet të ballafaqohen me ligjin”, ka thënë Muja në Këndin e Debatit në Tëvë 1.
