Ministri i Bujqësisë, Pylltarisë dhe Zhvillimit Rural, Armend Muja, ka njoftuar se ka nënshkruar një vendim për racionalizimin e hapësirave administrative brenda këtij dikasteri.
Sipas tij, ky vendim synon zhvendosjen e Ministrisë dhe institucioneve vartëse në objekte publike, duke shfrytëzuar pronën shtetërore dhe duke eliminuar kostot e panevojshme të qirasë.
Muja bëri të ditur gjithashtu se janë duke u krijuar Qendra të Integruara për Shërbime Bujqësore, të cilat pritet të ofrojnë shërbime më të organizuara, më të shpejta dhe më pranë fermerëve.
“Sot kam nënshkruar një vendim për racionalizimin e hapësirave administrative në Ministrinë e Bujqësisë. Ky vendim hap rrugën për zhvendosjen e Ministrisë dhe institucioneve vartëse në objekte publike, duke shfrytëzuar pronën e shtetit dhe duke i dhënë fund kostove të panevojshme të qirasë. Po ashtu, po krijojmë Qendra të Integruara për Shërbime Bujqësore, që do të ofrojnë shërbime më të organizuara, më të shpejta dhe më afër fermerit”, ka shkruar ai në Facebook.
Ai ka theksuar se nga ky proces priten kursime prej rreth 1 milion euro në vit që do të ridrejtohen në investime konkrete në sektorin e bujqësisë.
“Rezultati: rreth 1 milion € kursime në vit. Këto kursime do të kthehen menjëherë në investime konkrete: mbështetje për prodhimin vendor dhe fermerët, investime në mekanizim dhe teknologji bujqësore, zgjerim i ujitjes dhe rritje e produktivitetit dhe mbështetje për të rinjtë dhe gratë në bujqësi. Po ndërtojmë një administratë që kursen aty ku duhet dhe investon aty ku ka më shumë ndikim për qytetarët”, ka përfunduar Muja./teve1.info/
