Në mesin e atyre emrave, Muja ka përfshirë djalin dhe vëllain e presidentit të Serbisë, Aleksandar Vuçiq, të quajtur Danilo Vuçiq dhe Andrija Vuçiq, si pjesë e “Severna Brigadës”.
Njëherit, Muja kishte rekomanduar arrestimin e këtyre emrave, derisa kishte sqaruar në fillim të shkrimit të tij se Kosova nuk ka një listë për arrestim.
“Kjo është lista që unë do e rekomandoja për arrestim për një Mitrovicë pa krim, banda dhe barrikada”, ka shkruar Muja.
Përveç reagimeve të shumta, pa reaguar s’ka qëndruar as kryeministrja serbe, Ana Brnabiq, duke thënë se “kjo është lista e serbëve që duhet të arrestohen e që ekzistencën e saj Prishtina e mohoi ditë më parë”.
“Ky është edhe një mesazh tjetër brutal nga Prishtina se serbët nuk mund të ndihen të sigurt në Kosovën e Kurtit”, kishte shkruar ajo në reagim për qëndrimin e deputetit, Armend Muja.
Brnabiq tutje kishte thënë se “çfarë mund të presin serbët në Kosovë nëse Albin Kurti ka targetuar vëllain dhe djalin e Vuçiqit”.
E lidhur me këtë reagim të saj, deputeti Muja ka reaguar sot përmes një postimi në Twitter.
Ai ka thënë se Qeveria Kurti s’ka ndonjë “listë”, megjithatë ka shtuar se ekziston një listë e “bandave të njohura miqësore ndaj Rusisë, të mbështetura nga Serbia që terrorizojnë qytetarët tanë serbë në komunat veriore”.
Deputeti Muja ka këshilluar Bërnabiqin që të shikoj listën e sanksioneve të Shteteve të Bashkuara të Amerikës dhe të Bashkimit Evropian./teve1.info/.
