Kryetari i Pejës, Gazmend Muhaxheri ka thënë se të gjithë drejtorët në këtë komunë janë zgjedhur në bazë të konkurseve.
Ai në emisionin “Info Nata” në Tëvë 1 ka mohuar akuzat se përzgjedhja ka ndodhur pasi janë të partisë së tij.
“Asnjëri nga drejtorët nuk është zgjedhur drejtor pse ka qenë i partisë, por që shumica prej tyre që kanë konkuruar në konkurse. Është problem në disa shkolla për të pasur konkurs për drejtorë. Kjo pasi me Ligjin e Pagave diferenca në mes të rrogës së drejtorit dhe të arsimtarit është shumë e vogël, nuk është as 50 euro. Askush nuk merr përgjegjësi me konkuru, kur nuk merr shpërblim për atë punë. Të gjithë këqyrin si me ik, më i bë katër orë dhe më ik të shtëpia”, ka deklaruar ai.
Muhaxheri ka thënë se ka arritur që të gjithë shkollat t’i pajisë me nxehje qendrore.
“Kam incizime se si janë lënë shkollat gjatë qeverisjes së kaluar, ka pasur shkolla që tualetin e kanë pasur 100 metra larg shkolle. Unë kam mbërritur që të gjitha shkollat të jenë të pajisura me nxehje qendrore dhe tashmë jemi duke punuar në efiçensë të energjisë në to”, ka shtuar ai./teve1.info