Në një përgjigje me shkrim për Teve1.info, nga MSH kanë bërë të ditur se këto propozime i kanë dërguar në Qeveri dhe se versioni final për këto masa do të jetë ai që miratohet dhe publikohet në Gazetën Zyrtare.
“Ministria e Shëndetësisë, pas shqyrtimit nga trupat anti COVID-19 të situatës epidemiologjike lidhur me COVID-19 ka dërguar në Qeveri propozimet për lehtësimin e masave kundër COVID-19, ku ndër të tjera mund të pritet edhe heqja e kufizimeve të lëvizjes dhe lejimi i punës së klubeve të natës me gjysmën e kapaciteteve, krahas masave të tjera lehtësuese. Versioni final i vendimeve për masat do të jetë ai që miratohet në Qeverinë e Republikës së Kosovës, sapo të jenë miratuar vendimet dhe publikuar në Gazetën zyrtare”, thuhet në përgjigjen e MSH-së.
Aktualisht me masat anti-COVID në fuqi, personat që hyjnë në Kosovë duhet të kenë certifikatën e vaksinimit të plotë me dy doza, ose vaksinimin me një dozë së bashku me një test negativ PCR.
Sipas masave të miratuara më 5 shkurt, bartja e maskës duke mbuluar hundën dhe gojën, është e obligueshme në të gjitha rastet, në ambientet e mbyllura. /Teve1.info/
