Ministria e Shëndetësisë ka reaguar pas rastit në Malishevë, ku një grua ndërroi jetë pasi hoqi dhëmbin në një klinikë private, ngjarje pas së cilës u arrestuan dy mjekë.
MSh ka bërë të ditur se ka marrë veprimet e duhura pas rastit teksa ka shtuar se do të angazhohen që të ofrohen prova, në mënyrë që kryerësit e veprës të marrin dënime maksimale.
“Një ngjarje e tillë, në rrethana kur një qytetare humb jetën pas marrjes së shërbimeve stomatologjike në Institucionin Privat Shëndetësor “Doktorat” të cilët kanë ushtruar veprimtari ilegale, është e patolerueshme dhe do të angazhohemi që të ofrojmë të gjitha provat për dënime maksimale ndaj kryersve të kësaj vepre të rëndë”, thuhet në njoftim.
Po ashtu MSh ka njoftuar se janë shqyrtuar edhe raportet e komisionit të licencimit lidhur me veprimtarinë e këtij institucioni privat.
“Të gjitha këto të dhëna janë në dispozicion të Policisë së Kosovës dhe Odës së Stomatologëve të Kosovës si organe kompetente në funksion të zbardhjes së plotë të rastit, me qëllim që autorët e kësaj vepre të rëndë të marrin dënimin e merituar”, bëhet e ditur tutje në njoftim.
