Drenica po e ndjen erën e Ligës së Parë. Ata u mposhtën nga Ferizaj me rezultat të pastërt 2-0.
Në një ndeshje të parë pothuajse gjithçka, gola, raste dhe dy kartonë të kuq, vendësit arritën të shënojnë fitore tepër të rëndësishme në rrugën për mbijetesë.
Pjesa e parë ishte e qetë, mirëpo me t’u futur në të dytën, Albin Krasniqi i dha avantazhin skuadrës së tij dhe gjërat u përkeqsuan për Drenicën kur Hussein u ndëshkua me karton të kuq dhe la skuadrën me 10 lojtarë në fushë. Kartonin e kuq e pa edhe Enhar Cakolli i Ferizajt, mirëpo mysafirët nuk arritën ta shfrytëzojnë.
Një tollovi në mbrojtjen e skuadrës nga Skënderaj dhe Betim Haxhimusa nuk fal, duke shuar shpresat e Drenicës për fitore dhe minimizuar ato për mbetjen në ligë.
Ferizaj e sheh vetën në pozitën e 9-të me 34 pikë, aq sa ka edhe Trepça ’89 një pozitë më lart, në anën tjetër Drenica është në vendin e fundit në tabelë me vetëm 23 pikë.