Ministria e Punëve të Jashtme dhe Diasporës ka njoftuar se janë ndërmarrë të gjitha veprimet institucionale pas arrestimit të shtetasit të Kosovës, Mitehat Llozhani, i ndaluar në pikën kufitare Batrovci, në kufi me Kroacinë.
Sipas MPJD-së, Zyra Ndërlidhëse e Kosovës në Serbi ka dërguar kërkesë zyrtare pranë autoriteteve serbe për konfirmimin e arrestimit, sqarimin e arsyeve të ndalimit dhe çdo informacion tjetër relevant për trajtimin e rastit.
Po ashtu, Zyra Ndërlidhëse ka informuar Delegacionin e Bashkimit Evropian në Serbi dhe misionet diplomatike të vendeve të Quint-it, për të siguruar mbështetjen e partnerëve ndërkombëtarë në mbrojtjen e të drejtave dhe sigurisë së shtetasit kosovar.
“Ambasadori i Republikës së Kosovës në Serbi, Jetish Jashari është në kontakt të vazhdueshëm me familjen e të arrestuarit dhe përmes Zyrës Ndërlidhëse do të procedojë me paraqitjen e kërkesës zyrtare për lejimin e vizitës ndaj shtetasit Llozhani”, thuhet në njoftim.
MPJD i ka bërë thirrje Bashkësisë Ndërkombëtare që të rrisë presionin ndaj autoriteteve serbe, duke kritikuar vazhdimin e praktikave të arrestimit dhe trajtimit të padrejtë ndaj qytetarëve të Kosovës, që shkelin normat dhe standardet ndërkombëtare për të drejtat e njeriut.
